एक एक पाइला ठोकर्पा आधारभूत अस्पतालका दाताहरूको सम्मान तथा अभिन्नदन कार्यक्रम भव्यताको साथ सम्पन्न
एक एक पाइला ठोकर्पा आधारभूत अस्पताललाई वर्तमान अवस्थासम्म ल्याइपुर्याउन विभिन्न व्यक्ति, सङ्घसंस्थाहरूको पनि महत्वपूर्ण भूमिका रहेको छ । उहाँहरूको सोही योगदानलाई उच्च कदर गर्दै भाद्र १८, २०२२ गते एक एक पाइला फाउण्डेशनले एक एक पाइला ठोकर्पा आधारभूत अस्पतालको प्राङ्गणमा दाता सम्मान तथा अभिन्नदन कार्यक्रम आयोजना गर्यो । जनप्रतिनिधि, शिक्षक, बुद्धिजीवी वर्ग, आयुर्वेदिक संस्था, महिला समुह, युवा क्लब र गाउँबासीहरूको उपस्थितिमा आयोजन गरिएको अभिन्नदन कार्यक्रम उत्साहपूर्वक सम्पन्न भएको छ । अशोक पाण्डको उद्घोषणमा सञ्चालन गरिएको झण्डै दुई घण्टा लामो कार्यक्रममा विभिन्न गतिविधिहरू समावेश गरिएको थियो ।
प्रमुख अतिथि वडा अध्यक्षले पानसमा बत्ती बाली कार्यक्रमको शुभारम्भ गर्नुभएको थियो। एक एक पाइलाका उपाध्यक्ष प्रा.डा. सुधांशु केसीले कार्यक्रममा उपस्थित सबैलाई आफ्नो मन्तव्यद्वारा स्वागत गर्नुभएको थियो । त्यसैगरी, एक एक पाइला ठोकर्पा आधारभूत अस्पतालको पृष्ठभूमिबारे एक एक पाइला फाउण्डेशनको तर्फबाट संयोजक डा. सबिना भट्टराईले निकै हृर्दयस्पर्शी मन्तव्य राख्नुभएको थियो । उहाँले उक्त स्थानमा अस्पताल निर्माणको सपनादेखि अस्पताललाई वर्तमान अवस्थासम्म ल्याईपुर्याउन पछिल्ला दश वर्षदेखि आफू लगायत व्यवस्थापन समितिले सामना गर्नुपरेको आरोह-अवरोहहरूको निकै मार्मिक चित्रण गर्नुभएको थियो ।
कार्यक्रममा दाताहरूले पनि आफ्ना मन्तव्य राख्नभएका थियो । अस्पताललाई सहयोग गर्न पाएकोमा अत्यन्तै खुसी लागेको साथै आगामी दिनहरूमा पनि अस्पताललाई यसगरी आफ्नो सहयोग र साथ रहिरहने प्रतिबद्धता दाताहरूले दिनुभएको थियो ।
दाताहरूलाई सम्मानस्वरुप खादा लगाउने एवम् मायाको चिनो प्रदान गरेपश्चात कार्यक्रममा उपस्थित जनप्रतिनिधिहरूले पनि आफ्ना मन्तवयहरू राख्नुभएको थियो । अस्पतालको निर्माण र सञ्चालनपछि स्वास्थ्य क्षेत्रमा सुनकोशी गाउँपालिका बासीहरूलाई मात्र नभई वरपरका पाँचभन्दा बढी गाउँपालिकाका मानिसहरूलाई राहत पुगेको बताउनुभएको थियो ।
कार्यक्रमको सभापति तथा एक एक पाइला फाउण्डेशनका अध्यक्ष प्रा.डा सुमन शम्शेर थापाले कार्यक्रमको विसर्जन गर्नुभएको थियो ।
यसका अतिरिक्त, दाता तथा जनप्रतिनिधिहरूलाई अस्पताल परिसर घुमाउने लगायत अस्पतालले प्रदान गर्ने सेवाहरूबारे जानकारी दिने कार्यसमेत भयो ।
कार्यक्रममा अझ उत्साह थप्न, कार्यक्रमको अन्त्यमा ब्लू फ्रेट ब्यान्डको सांगीतिक प्रस्तुति पनि समावेश गरिएको थियो ।
यस कार्यक्रमको अपार सफलताका निम्ति हामीसँग समन्वय गर्नुहुने समस्त महानुभाबहरू लगायत कार्यक्रमलाई प्रत्क्षय प्रसारण गर्न सहयोग पुर्याउने प्राविधिक समुहप्रति एक एक पाइला फाउण्डेशन विशेष आभार व्यक्त गर्दछ ।
